“الحلقة الأولى “”لا تدينوا””
بسم الآب والابن والروح القدُس الله الواحد آمين.
أهلًا بِكم في برنامج جديد هنسميه “”آيه وحكاية””
فيه هنقرأ آيه من الكتاب المقدس 📖 وهنشوف حكاية حلوة من تاريخ الكنيسة ⛪ مرتبط بالآيه دي وتطبيقها في حياتنا ..
الآيه بتاعت النهاردة موجودة في إنجيل القديس متى اصحاح 7 والآيه1 و2
«لاَ تَدِينُوا لِكَيْ لاَ تُدَانُوا، لأَنَّكُمْ بِالدَّيْنُونَةِ الَّتِي بِهَا تَدِينُونَ تُدَانُونَ، وَبِالْكَيْلِ الَّذِي بِهِ تَكِيلُونَ يُكَالُ لَكُمْ.
دي الآيه اللي قالها الرب يسوع
القديس أنبا مقار ذُكر عنه إنه كان كما لو إِنه إله على الأرض و ده بسبب إنُه كان بيِتَشبّه بربنا في ستره للخطايا🙈 فَ قِيل عنه كدا انه زي ما ربنا بيحمي العالم .. أنبا مقار بيستر على أي خطية شافها أو أي خطية سمعها، وكأنه ولا شافها🙈وكأنه ولا سمعها🙉
كمان في مرة الأنبا باستور قال لواحد من الأخوة قاله خُد بالك لا تحكم على أخ ولو سقط في زنا حتى لو كنت عفيفًا وذلك لأنك ستكسر الناموس مِثلُه لأن الذي قال لا تزني قال أيضًا لا تدن.
القديس الأنبا بيمن سأله أخ قاله: لو أنا شوفت أخويا بيغلط هل صح ان أنا مجبش سيرة 🫢 عن اللي هو عمله؟ فقاله خُد بالك لما اِحنا نَستُر على خطايا اخواتنا الله يفعل معنا نفس الشئ .. أما إذا ذِعناها وحكيناها للآخرين 🧑🏻🦱👩🏻🦱👨🏻🦱🗣️ فالله أيضًا يصنع معنا نفس الشئ
الحكاية بتاعت النهاردة أعتقد أغلبنا عارفها ..
الحكاية الجميلة بتاعت القديس الأنبا موسى الأسود لما أخ عندهم في الإسقيط سقط في خطية وعملوا مجمع عشان يحكموا عليه ودَعو الأنبا موسى يروح .. الأنبا موسى مرضيش يروح .. فلما اتأخر راح الكاهن بتاع هذا الموضع يقوله يا أنبا موسى أنت اتأخرت ليه؟ اِحنا كلنا منتظرينك. فقاله: طيب وراح ملأ شوال رملة وثقب هذا الشوال وشاله على ضهره .. الأب الكاهن مستغرب .. الإخوة شافوا المنظر ده .. ايه ده يا أنبا موسى؟! ايه ده اللي أنت شايله على ضهرك وقاعد يِخُرّ؟ قالهم: دي خطايايَّ قاعده تجري من ورا ضهري وأنا جاي أدين اخوتي .. فالرسالة وصلت ولما الإخوة سمعوا كده انتفعوا ومضوا كل واحد إلى موضعه ولم يُحزنوا ذلك الأخ بشئ.
لاَ تَدِينُوا كي لاَ تُدانُوا❤️ آمين.”
