الحلقة الثانية “السلام الداخلي”
بسم الآب والابن والروح القدُس الله الواحد آمين.
أهلًا بِكم يا أحباء في حلقة جديدة من سلسلة “آيه وحكاية”
عنوان حلقتنا النهاردة “السلام الحقيقي” 🕊️🌿
والآية بتاعتنا النهاردة .. آيه جميلة 😍 .. جَت في رسالة معلمنا بولس الرسول لأهل رومية اصحاح 12 والآية 18
“إن اَمكن فعلى قدر طاقتكم سالموا جميع الناس”
إن اَمكن فعلى قدر طاقتكم سالموا جميع الناس 🌿
يعني القديس بولس بيقول لو الأمر يعتمد على اي حاجة أنت تقدر تعملها .. اعملها من فضلك وكون في سلام مع الآخر
أقوال آباء الصحراء بتقولنا شوية تعاليم جميلة 🥰 بخصوص السلام الحقيقي 🕊️🌿
فيه أخ كدا راح للقس إيسيذورس اللى كان أب اعتراف الأنبا موسى الأسود قس الإسقيط وقاله أنت ليه الشياطين منزعجة منك؟! فقاله من ساعة ما أنا بقيت راهب ودايمًا بحاول ان الغضب لا يغادر فمي
من ساعة ما بقيت راهب ودايمًا بحاول ان الغضب لا يغادر فمي
كان فيه أتنين من الآباء المعاصرين للقديس العظيم الأنبا أنطونيوس .. واحد اسمه الأب يوسف ( أبّا يوسف ) وأبّا نستيروس ..
أبّا يوسف سأل أبّا نسيروس قاله: أعمل ايه مع لساني؟ .. فقاله: ايه ماله؟ .. قاله: بيجيبلي مشاكل .. فقاله: انت لما بتتكلم بتلاقي سلام؟ .. قاله: لاَء، لما بتكلم مش بلاقي سلام .. قاله: طب لما انت بتتكلم مش بتلاقي سلام .. بتتكلم ليه؟! خليك صامت وفي اي محادثة اسمع اكتر ما تتكلم ..
كمان فيه أحد الإخوة ذهب للأنبا بيمن وقاله: اعمل ايه في القلاية بتاعتي؟ اسلك فيها ازاي؟ فقاله: منين ما تروح اسلك كأنك غريب ودايمًا لا تتوقع ان يكون لكلماتك تأثير وبذلك تقتني سلام في قلبك❤️🌿 يعني متتعشمش جامد ان أي كلمة انت هتقولها .. دا هيجري يسمعها و دا هينفذها و دا هيعمل بيها .. لأنه لما مبيحصلش كده بنحبط ونغضب ويبتدي يتحرك جوانا طاقات الغضب .. فقاله: اعمل في حسابك انك تعيش غريب ومتتوقعش ان يكون لكلماتك تأثير.
القصة بتاعتنا النهاردة قصة جميلة 🥰 .. جَت في كتاب حِكم آباء الصحراء
بتحكي عن اتنين من الآباء الشيوخ .. عاشوا مع بعض فترة طويييلة وعمرهم ما اتخانقوا على حاجة .. فَ جِه احد الآباء يقول للتاني .. قاله ما تيجي نحاول نتخانق زي ما باقي الناس بتتخانق .. فَ رد الآخر قاله بس أنا مبعرفش اتخانق .. قاله هي بسيطة أنا هعلمك هي تبدأ ازاي .. اِحنا هنجيب طوبة ونحطها وسطينا .. وأنا هقول دي بتاعتي ف أنت ترد تقول لأ دي بتاعتي أنا هتلاقي الخناقة بدأت تقوم .. فقاله ماشي .. راح الشيخ الأولاني جاب طوبة وحطها وسطيهم ..
قاله على فكرة الطوبة دي بتاعتي .. راح الشيخ التاني قاله لأ دي بتاعتي أنا .. راح الشيخ الأولاني قاله خلاص مادام بتاعتك خُدها وامشي .. فَ معرفوش يتخانقوا 😅❣️فَ ملقوش حاجة يحصل بسببها النزاع 🥰
أحبائي آية النهاردة جميلة “إن امكن فعلى قدر طاقتكم سالموا جميع الناس” يعنى لو الأمر اي شئ فيه يعتمد على حاجة تقدر تعملها .. من فضلك اعملها وكون في سلام مع الآخرين ..
وإلى لقاء في حلقة قادمة😍👋🏻
