“الحلقة العاشرة “”الروح القدس4″”
بسم الآب والابن والروح القدُس الله الواحد آمين.
أهلًا بِكم يا أحباء ❤️👋🏻 في حلقة جديدة من برنامجنا “”آية وحكاية”” ولازلنا في سلسلة حلقات عن “”الروح القدُس”” 🕊️🥰 والحلقة بتاعتنا النهاردة بعنوان “”الروح القدُس الرسَّام الإلهي”” 🥰🖌️🎨
الآية بتاعتنا النهاردة من كورنثوس التانية3: 18
وَنَحْنُ جَمِيعًا نَاظِرِينَ مَجْدَ الرَّبِّ بِوَجْهٍ مَكْشُوفٍ، كَمَا في مِرْآةٍ، نَتَغَيَّرُ إِلَى تِلْكَ الصُّورَةِ عَيْنِهَا، مِنْ مَجْدٍ إِلَى مَجْدٍ، كَمَا مِنَ الرَّبِّ الرُّوحِ.
آية معروفة آية مشهورة بتقولنا ان الروح القدُس رسَّام إلهي 🖌️🎨✨ بيرسم فينا ملامح المسيح وبنتغيّر من صورتنا بتاعت آدم الأول لصورة آدم التاني بعمل الروح القدُس فينا 🕊️🤍✨
والقديس أنبا مقار طبعًا لفت نظرُه هذا الأمر فَ جِه في العظة رقم11 من مجموعة عظاته بيشرحلنا ازاى نار الروح القدُس 🔥 دي بتشكل نفوسنا على شكل المسيح وتغيّر ملامحنا لملامح المسيح .. فقالنا حاجة جميلة خالص🥰 قال فاكرين شعب إسرائيل لما خرج من أرض مصر وطلع موسى عشان يستلم الشريعة 📜📜 وبعدين اتأخر فَ راحوا مسكوا في هارون وقالوا له موسى دا احنا مش عارفينه اتأخر ليه 🤷🏻♂️ ولا عارفين ايه اللي اصابه .. يَلَّا اعملنا آلهه تمشي قدامنا .. فَ راحوا اِدُوا له كل واحد الآنية اللي عندهم الدهب واللي عندها خواتم واللي عندها حلقان واللي .. واللي .. راح خد هارون كل الحاجات دي وراح طرحها في النار فَ طلع منها عِجل ذهبي زي اللي كان في مصر وفرحوا خالص وقعدوا يعبدوا العِجل وذاغوا عن ربنا
فقال شوفتوا النار دي .. النار دي راحت صورت ما في قلوبهم يعني قلوبهم كان فيها العِجل الذهبي دا اللي شافوا في مصر فَ لأنه في قلوبهم راحت النار عملتلهم اللي في قلوبهم بالحاجات اللي هما رموها في النار
و راح القديس أنبا مقار قال هكذا اللذين يقبلون نار الله في داخِلِهم 🔥 (نار الله اللي هي ايه؟ الروح القدُس 🕊️🔥 ) فإن النار نفسها تطبع صورة سماوية في طبيعتهم البشرية.
يعني ايه؟ يعني النار تأخُد شهوة قلوبنا لأن شهوة قلوبنا الرب وبنحبه ومشغولين بيه 💭❤🔥✨ فَ نار الروح القدُس تروح واخده الشهوة بتاعت قلوبنا دي اللي هي في ربنا وتشكِّل وتطبع فينا الصورة السماوية الجديدة
عشان كدا نصلِّي نقوله يارب خَلِّي قلوبنا متفكرش غير فيك .. خَلِّي قلوبنا متشتهيش غيرك .. خليك انت يارب دايمًا اللي شاغل قلوبنا وأفكارنا عشان نار الروح القدُس تشكّل بداخلنا صورة اشتياقاتنا 🔥💓✨ فَ زي ما كانت النار بتاعت العهد القديم طلّعت لهم العِجل الذهبي اللي كان في قلوبهم نار الروح القدُس اللي فينا تطلّع لنا صورة المسيح اللي احنا مشغولين بيه ليل ونهار وطول الوقت بنقول اسمه 📿 وبنفكر فيه 💭💓
ربنا يفرّح قلوبكم ويرسم فيها دايمًا صورته الحلوة🥰🖌️🎨 ولإلهنا كل مجد وكرامة إلى الأبد. آمين.”
