تأملات في سفر التثنية “الأصحاح السابع”
مازالت رحلة بني إسرائيل بتكشفلنا عن أعماق تعاملات الله معانا ومحبته لينا وإن حياتنا بجملتها بين إيديه
بيبدأ الأصحاح «متى أتى بك الرب إلهك…وطرد…ودفعهم…» (1- 2) وبعدها بشوية الرب اختارنا وقدسنا والتصق بنا واحبنا وفدانا (6–11) «ولكن الرب إلهك يطرد هؤلاء الشعوب من أمامك قليلًا قليلًا لا تستطيع أن تفنيهم سريعًا»(22)
هنلاقي إن الأفعال الأولى هي خطوات ربنا اخدها ناحيتنا، بيبدأ الطريق الروحي بنظرة حب من الله لينا ودعوة صوتها بيخترق قلوبنا، ومش بيقف المشهد هنا، لكن بنلاقي كتفه في كتفنا، ماشي معانا الطريق بيطرد من أمامنا عدو الخير وجنوده، بيطرد من قدامنا افكار الشر ومشاوير مفروض منروحهاش ومشاهد مفروض عنينا متسجلهاش، كبريائنا، النصيب الأكبر، علاقات غير مقدسة وحب استغلال، مخاوف من المستقبل وحزن وانكسار من الماضي، عدم الأمانة والكذب واللف والدوران،…
لكن من حنية قلب يسوع علينا بيعمل كدة قليلًا قليلًا، بعد نظرة الحب الأولى، يبدأ يكشف قدام عنينا من خلال وصيته عدو عدو من اللي جوانا، ويبدأ يقلي ايدي فايدك ناخد خطوة لقدام ونطرده من جواك. وده بيفزعنا، لأن بيجي وقت باعتقد ان خلاص بقيت بلا خطية، واحس ان علاقتي مع ربنا مش صح لان لسة في خطايا بكتشفها جوايا. ربنا يعلمنا نهدا قدام نور الوصية اللي بتكشفلنا عن نجاسة قلوبنا، ونتضع قدامها
الله بيحب الشركة فى العمل. ودي من أكبر المشاكل اللي بتقابلنا، ان بعتقد ان ربنا هو اللي هيفتقدني وهيخلصني وهينقيني وهيحافظ هو عليا ان مغلطش تاني. لكن في دور على الله ونعمته وفي دور عليا.
الله دعاهم وشجعهم وهيئ الطريق قدامهم، لكن باقي عليهم أن يحاربوا وينتصروا، يكسروا ويحرقوا كل علاقة ممكن تربطهم تاني بباقي الشعوب. الله أحبنا وفدانا وبتجسده انتصر لينا في كل الأمور اللي عدى بيها، وباقي علينا ان احنا كمان نلتصق بيه ونحيا فيه ونحارب وننتصر، الله بيكشف لينا عن اللي معطل حياتنا وعليا أنا كمان دور اخده، ناحية العلاقات اللي بتجيبني ورا، وأصحابي اللى بيشدوني لتحت، والأماكن اللي بتسهل ليا الخطية
ربنا يدينا نعمه ان نشوفه رفيق أمين في الطريق، ونصدق ان دعوته لينا ورسالتنا هي شركة معاه، مش طريق منفرد بنمشيه لوحدينا، لكن هو بيحارب عنا، وبيضمن النصرة لينا لكل اللي بيحفظ وصاياه ويمشي على نورها لا تزل قدميه
