تأملات في سفر التثنية «الإصحاح العشرون»
«إذا خرجت للحرب على عدوك ورأيت خيلًا ومراكب، قومًا أكثر منك، فلا تخف منهم (متخافش) …» (ع1)
لو بدأت يومك الصبح ولقيت إبليس طلع عليك بمركباته وخيله وعمال يضايقك، ويحط الخطايا قدامك، بيزعجك ويخوفك من المستقبل، ويفكرك بخطايا قديمة توبت عنها، متخافش، لو قعد يحاربك باليأس وانك فاشل، (متخافش)، لو قعد يضغطك بالوحدة، لو قعد يزن عليك عشان تسدد احتياج بطريقة مش صح، (متخافش)،لو قعد يشكك في دعوتك وطريقك ورسالتك، متخافش) لو قعد يزعزع أمانك وثباتك في ربنا، لو قعد يشكك في غفران الله ومحبته (متخافش)
متخافش مش لأنك بطل وامكانياتك جبارة
لكن متخافش لأن الرب سائر معك ويحارب عنك ، متخافش لأن اتحطيط في مواقف قبل كدة ويمكن اصعب من الموقف الحالي اللي انت فيه واصعدك من أرض مصر وطلعك منه، متخافش لأنه اتجسد وعاش نفس ظروفك واتحارب واتجرب وانتصر لحسابك، فتركه إبليس إلى حين، متخافش لأن مش انت اللي هتحارب لكن الرب هيحارب عنك.
أمال انا بخاف ليه؟!
في أصحاح النهاردة بيتكلم عن 3 احتمالات ممكن تكون خايف بسببهم فمش هينفع تطلع للحرب ضد إبليس وجنوده:
1-الرجل الذي بنى بيت جديد (ع 5): بيخاف الشخص اللي ماسك في الدنيا، ومش قادر يشعر انه غريب ونزيل، وان وطنه الأساسي مش هنا، ففي خطايا كتير وافكار كتير مش بيقدر يقف قدامها لانه متمسك بسكنه الأرضي، ويخاف يحاربها يخسر السكن ده. لكن كل شخص عايش بقلب غريب ونزيل وعينه مفتوحه على وطنه السماوي، ميخافش ان يسيب حاجة او مكان او اشخاص
2-الرجل الذي غرس كرمًا (ع6): بيخاف الشخص اللي بيحب الفلوس والاستثمار والشغل، وبدل المشروع اتنين، كل تفكيره في الشغل وازاي يجيب فلوس، حتى لو ده هيجي على حساب علاقته مع ربنا، وعلى حساب خدمته، اجتماع روحي بيحضره،خلوته ومخدعه.
3- الرجل الذي خطب امرأة (ع 7): الشخص اللي بيخاف هو اللي ارتبط قلبه بالشهوات الجسدية، اللي بيعيش جوة الخطايا الجسدية، بيعيش جبان وخايف وحاسس انه مرزول ومكسور، حاسس انه وحيد ومنعزل، وإبليس بيسيطر على تفكيره ان عمره ما هيقدر يبطل الشهوة ولا الخطية دي
لو نوع الرجال دي مينفعش تطلع للحرب، يبقى انا مستغربش لما الأقي نفسي أوقات مش قادر احارب ولا اقف ضد خطية ولا اخدم وحاسس نفسي مخنوق ومقفول، راجع مخدعك وقلبك من جديد، هل مخدعك ثابت مع الرب ، هل سائر معاه، متمسك بيه
