تأملات في سفر التثنية “الأصحاح الرابع والعشرون”
الأصحاح بيرفع طريقة تعاملنا مع الآخر، وبيبن اد ايه الله مهتم بكرامة الإنسان من قبل ما يكون في جمعيات حقوق إنسان، وده بيوضحلنا اد ايه فعلًا كل أمر في حياتنا ليه علاج في كلمة الله، زي ما كانوا بيسموها الآباء ان كلمة الله هي خزانة أدوية، ان المعاملات الإنسانية الله اتكلم عنها ومن زمان، وان مش هدف الله من الوصية – زي ما بنعتقد احيانًا ويكذب علينا ابليس – ان نكون من غير كرامة لكن الوصية نفسها بتأكد ان نحافظ على كرامة بعض
تعالوا نشوف ايه الجوانب اللي بيشاورلنا عليها الأصحاح ده
كرامة الأسرة والعلاقات(ع1-5): بيوصي الزوج والزوجة كويس جدًا، الموضوع مش انك اضايقت شوية، فهتسيبها ولما تحب ترجعلها هينفع ترجعلها، فكر كويس أوي قبل قرارك، فكر كويس قبل ما تخليها تمشي وتسيب البيت انك مش هتعرف ترجعها تاني. فكر في طريقة تعاملك معاها، ونظرة الله المقدسة للزواج، هو مش مجرد حالة اجتماعية في البطاقة، الرب نفسه شبه علاقته بالكنيسة بعلاقة الزواج. خلينا نقول على مستوى اصغر والعدد الأكبر لينا كشباب في المدرسة، فكر كويس أوي وانت بتتعامل مع أي بنت على انك هترتبط بيها، فكر قبل ما تدخل في العلاقة انت قدها ولا لا، هتقدرتكمل ولا اهو ادينا مع بعض ويا مسهل، فكر قبل ما تسيبها وتروح لواحدة تاني، وبعد شوية تكون عايز ترجع تكلمها تاني، فكري في الشخص اللي بتتعاملي معاه، محافظ على كرامتك ولا بيستغلك ومستعبدك في العلاقة، متخافيش انك تاخديه قرار بانك تنهي العلاقة، افضل من الاستمرارية مع ضياع الكرامة
كرامة استبقاء الحياة(ع 6): بيتكلم ان مينفعش تاخد الرحى رهن، لان الرحى دي اللي بيطحنوا بيها الغلة عشان يقدروا يأكلوا، عشان يقدروا يعيشوا، محتاجين ناخد بالنا احنا بندوس على اللي قدامنا في انهي نقطة، محتاجين نتعلم منجيش عند النقطة اللي حاسس ان هي دي اللي عايش منها، وعايش بيها وحاول استحوذ عليها واخدها منه
كرامة للنفس(ع7): سرقة النفس ممكن ان اسرق حرية شخص، كتير بنحاول نسرق حرية الناس اللي حولينا، ونستعبدهم، بنشوف كتير علاقات صداقة بتخنق على بعض، متحبش تصاحب حد تاني، ولا تروح رحلة ولا خلوة من غيرها، ولا تخرج ولا تكلم ناس غيرها، متنزلش صور لاشخاص تانية. النهاردة بيدعونا الأصحاح ان نطلق حرية اللي حولينا ومنستعبدهمش لينا
يُتبع
4- كرامة المديون والفقير (ع10 – 13): محتاجين نتعلم منتكلمش على بعض كتير، وعن اي تعاملات شخصية بيني وبين شخص تاني، لو شخص استلف مني حاجة بلاش اروح اقول لكل اللي حوليا ان واخد منى حاجة ولسة مرجعهاش، او اروح اقول لكل افراد بيته، واشهر بيه، احترم حياته واحترم بيته واحترم احتياجه. وبالنسبة للفقير والمحتاج، في خدمات كتير بأحشاء رحمة بدأت تتعامل مع أخوة الرب بشكل أرقى، وبقيت تتفق مع صاحب المحل ان فلان هيجي ياخد منك (تلاجة، بوتاجاز، ….) والشخص يروح ياخدها وهو اللي يروح بيها بيته ويدخل بيها على أولاده، بتحفظ كرامته وسط أهل الشارع، ان مش حد جيبهاله، وبتحفظ كرامة أولاده ان مش ناس بتصرف علينا. محتاجين نتعلم ازاى فعلًا يكون عندنا أحشاء رحمة ناحية اللي حولينا بس بطريقة تحفظلهم كرامتهم
5-كرامة الأجير أو العامل(ع 14 – 15): لو انت صاحب عمل، وفي ناس بتشتغل عندك،محتاجين نخلي بالنا من تعاملنا معاهم،منجيش عليه ومستغلهوش لمجرد ان محتاجلي ومحتاج يكون في المكان ده، عشان كدة كدة مش هيمشي، مستعبدهوش في الشغل، وفي طريقة التعامل.
6-كرامة الأرملة واليتيم والغريب (ع17 – 22): كل ما الشعب هيفتكر انه كان عايش غريب، هيكرم الغريب، وكل ما احنا نفتكر ان احنا عايشين غرباء هنقدر نكرم كل غريب نقابله، كل شخص يعرف أرملة أو يتيم في الوسط اللي حوليه، يقدر يوفر شوية من وقته ويزورهم، أو جزء من فلوسه ويجيب حاجة للأطفال، او شوية من طاقته ويسمع وجع الأم.
الله فكر في الأسرة والزوجة والزوج والناس اللي عليها ديون والناس اللي بتسرق النفوس وتستعبدها وفي الكهنة والمديون والفقير والأجير والمُذنب والغريب واليتيم والأرملة، لو لسة في بالك فئة متكلمناش عنها قبل كدة أو من دول، متستعجلش لسة السفر مخلصش، ولسة الله هيوصينا عليهم، وهيشدد نفوسنا لو احنا منهم
لسة بتشك ان ربنا مهتم بكل واحد بشكل شخصي، لسة بتشك ان لو عشنا بالوصية هنعيش فعلًا حياة كريمة، هنكون بندي كل واحد حقه وبيجلنا حقنا، لسة بتشك ان كلمة الله في علاج لكل مرض نفسي وروحي واجتماعي، لسة بتشك في محبة ربنا لكل شخص مهما كانت حالته وبيفكر فيه وفي ظروفه.
متخافش لأنك موجود جوة دايرة رعاية الله الشخصية ليك
