تأملات في سفر التثنية “الأصحاح الخامس والعشرون”
أصحاح النهاردة بيجي في أخره في الأعداد ( 13 – 15) كدة وبيشاورلنا على مشكلة كبيرة عايشين بيها، قضية مكروهة أمام الرب ولكن للأسف بنمارسها ويمكن أوقات من غير مانحس، مكاييل مختلفة، ووشوش مختلفة، في أوقات كتير بنتلون على حسب الموقف وعلى حسب الشخص
مكاييل مختلفة في ردود أفعالنا، لو شخص بحبه واستلطفه يعمل اللي عايزه اعديهاله، ولو شخص تاني عمل حاجة اقل اتعصب عليه واقلب عليه ومحبش اكلمه.
بنستخدم وشوش مختلفة ما بين السوشيال والواقع، نلاقي صفحاتنا مدشنة بالآيات وأقوال الآباء وأجزاء من كتب، بتتكلم عن انكار الذات وعن الحب وقبول الآخر والخدمة، لكن اجي في الواقع، أول ما شخص يجي يقرب من ذاتي، الاقي نفسي مضايق انه عاتبني او كلمني، واحاول بكل الطرق ابرر موقفي، أو ادافع، واثبت ان دايمًا صح
وشوش كتير في مفهومي عن الحرية، اقعد اتكلم ان لازم اكون بدي اللي قدامي حرية في التعامل والتعبير عن رأيه، وعلاقته معايا، وان انا بحبه، واجي في الواقع بيني وبين نفسي وانا ببص على قلبي، الاقي نفسي بضايق لما اشوفه مع شخص تاني، وبضايق لما بيعبر عن رأيه، وبضايق لما بيتصرف من غير ما أكون عارف
بنستخدم مكاييل كتير ما بين الحكم على الناس والحكم على نفسي، بيني وبين نفسي بقول الإنسان ضعيف وبيقع ولو وقعت يلا قوم وكمل، واطلب مغفرة واقدم توبة، ولو شخص وقع، ازاي يعمل كدة وازاي يكون ده خادم وازاي يغلط والكنيسة قبلاه، وازاي ابونا راضي يخليه يخدم، وكأن مكيال خطيته اللي هي هي أنا وقعت فيها مختلف عن مكيالي
في فجوة مكاييل وفجوة وشوش ما بين كل اللي بتعلمه وبقراه وبسمعه في العظات وما بين سلوكي الفعلي ونقاوة حياتي الداخلية واتجاهات قلبي وفكري
أصحاح النهاردة بيفكرنا ان ده مكروه جدًا أمام الله، مفيش شركة ما بين النور والضلمة،بين أعمال الله وأعمال إبليس،بين حبي لذاتي وحبي لله
احنا قولنا امثلة قليلة، لكن كل واحد يبص جوة قلبه ويراجع مواقف يومه، درب نفسك ان نهاية كل يوم تراجع ردود افعالك وسلوكك وتصرفاتك،كانت بمكيال الحق، ولا استخدمت كذا مكيال، هل كنت ب 100 وش ولا واضح وصريح
ربنا يعلمنا ويسندنا بنعمته ان نتخلص من مكيال منهم، ونعيش بمكيال واحد، مكيال الحق، مكيال الروح القدس ونوره وارشاده، ويكون عندنا مكيال واحد، لكن بإفراز وبتمييز وحكمة في التعامل والسلوك
